Egwyddorion Tiwtoriaeth

Egwyddorion Tiwtoriaeth

• Egwyddor 1 - Diwylliant sefydliadol a Thiwtoriaeth

  Rhaglen strwythuredig o gefnogaeth a datblygu proffesiynol ydy Tiwtoriaeth, wedi’i
  chynllunio gyda’r bwriad o wella hyder unigolion cofrestredig mewn cyfnodau o
  bontio i unrhyw rôl newydd.

  Mae Tiwtoriaeth yn cyfrannu at ddiwylliant sefydliadol lle bydd unigolion
  cofrestredig yn derbyn cefnogaeth i gyflawni eu potensial tra byddant yn darparu
  gofal a thriniaethau diogel ac effeithiol.

  Dylai Tiwtoriaeth effeithiol:
  
  a) fod wedi’i hymgorffori yn systemau gweithlu a sefydliadol y sefydliad er mwyn galluogi mynediad ac ymgysylltiad gan Diwtoreion;
  
  b) cydymffurfio â deddfwriaeth cydraddoldeb ac ystyried polisïau cydraddoldeb, amrywiaeth a chynhwysiant cenedlaethol a lleol;
  
  c) darparu cyfleoedd i Diwtoreion ddatblygu hyder a chefnogi eu gyrfa yn y dyfodol;
  
  d) rhoi blaenoriaeth i iechyd a lles Tiwtoreion a Thiwtoriaid; a
  
  e) Hyrwyddo diwylliant o ddysgu, hunanfyfyrio ac ymarfer diogel

• Egwyddor 2 - Goruchwylio Tiwtoriaeth a’i hansawdd

  Mae Tiwtoriaeth yn fuddsoddiad pwysig yng ngyrfa broffesiynol unigolion cofrestredig.

  Dylai pob unigolyn cofrestredig gael mynediad at raglen Tiwtoriaeth o ansawdd. Mae’n dangos gwerth iechyd, lles a hyder unigolion cofrestredig yn ystod cyfnodau pontio.

  Er mwyn galluogi Tiwtoriaethau effeithiol, dylai fod:
  
  a) prosesau er mwyn sicrhau y gall unigolion cofrestredig dderbyn Tiwtoriaeth sy’n bodloni eu hanghenion unigol;
  
  b) prosesau ar waith i gefnogi cymysgedd briodol o ddysgu a datblygu proffesiwn-benodol, aml-broffesiwn ac un-broffesiwn o fewn sefydliadau neu gyda rhwydweithiau systemau a phroffesiynol ehangach;
  
  c) integreiddio gyda rhaglenni sefydlu i swyddi proffesiynol lle bo hynny’n briodol;
  
  d) cydnabyddiaeth o effaith heriau systemau a sut i’w lliniaru;
  
  e) systemau ar waith i fonitro, gwerthuso ac adolygu rhaglenni Tiwtoriaeth;
  
  f) fframweithiau llywodraethu proffesiynol a sefydliadol sy’n galluogi archwilio ac adrodd ar y broses; a
  
  g) dealltwriaeth o, a chydymffurfio â, pholisïau cenedlaethol a lleol, a’r gofynion llywodraethu perthnasol sy’n ofynnol gan bedair gwlad y Deyrnas Unedig.

• Egwyddor 3 - Grymuso Tiwtoreion

  Dylai Tiwtoriaeth gael ei theilwra ar gyfer y Tiwtorai unigol, eu swydd a’u hamgylchedd gwaith.

  Ni ddylai Tiwtoriaeth ailbrofi cymhwysedd clinigol ond yn hytrach, dylai rymuso’r Tiwtorai i fyfyrio ar yr hyn maent yn ei gynnig i’w swydd a chanfod pa gefnogaeth sydd ei hangen er mwyn datblygu eu hyder proffesiynol.

  Dylai Tiwtoriaeth effeithiol ddarparu’r canlynol i unigolion cofrestredig:
  
  a) Mynediad at raglen Tiwtoriaeth sy’n meithrin pwysigrwydd datblygu proffesiynol parhaus;
  
  b) adnoddau a chanllawiau priodol ar gyfer datblygu hyder a chefnogi datblygiad proffesiynol parhaus;
  
  c) rhaglen wedi’i theilwra o gefnogaeth a dysgu sy’n adlewyrchu anghenion unigol;
  
  d) Tiwtor penodedig ar gyfer cyfnod cyfan eu Tiwtoriaeth; a
  
  e) ymreolaeth sy’n caniatáu iddynt ddylanwadu ar hyd a chynnwys eu Tiwtoriaeth mewn partneriaeth â’u Tiwtor, pobl eraill yn eu sefydliad a rhwydweithiau proffesiynol ehangach.

• Egwyddor 4 - Rôl Tiwtoriaid

  Mae rôl y Tiwtor yn rhan hollbwysig o Diwtoriaeth effeithiol. Dylai Tiwtoriaid gael hyfforddiant, amser a chefnogaeth priodol i allu deall a chyflawni eu rôl.

  Nid oes rhaid i Diwtoriaid fod o’r un proffesiwn â’r Tiwtoreion, ond dylid sicrhau mai nhw yw’r unigolion mwyaf priodol i ddarparu cefnogaeth.

  Mewn Tiwtoriaethau effeithiol, dylai’r Tiwtoriaid:
  
  a) weithredu fel model rôl proffesiynol a bod yn gefnogol, yn adeiladol ac yn dosturiol eu ffordd;
  
  b) helpu i hwyluso agweddau aml-broffesiwn ar y Diwtoriaeth lle bo hynny’n briodol;
  
  c) cynorthwyo Tiwtoreion i fyfyrio ar eu datblygiad a’u cyfeirio at gefnogaeth a chyfleoedd datblygu perthnasol;
  
  d) cynorthwyo Tiwtoreion i ymgysylltu â’u proffesiwn yn ehangach, a helpu i ddatblygu rhwydweithiau yn lleol neu drwy rwydweithiau proffesiynol allanol;
  
  e) rhannu ymarfer effeithiol a dysgu gan ei gilydd;
  
  f) cael eu hannog i weld manteision personol a phroffesiynol ymgymryd a rôl Tiwtor; a
  
  g) chael mynediad at adborth ynglŷn ag ansawdd ac effeithiau pob agwedd ar eu gwaith fel Tiwtoriaid.

• Egwyddor 5 - Darparu rhaglenni Tiwtoriaeth

  Dylai rhaglenni Tiwtoriaeth adlewyrchu’r gwahaniaethau yn y llwybrau tuag at gofrestru, amrediad a dwyster profiadau ymarfer blaenorol, a’r amrywiaeth o wasanaethau a lleoliadau y mae unigolion cofrestredig yn gweithio ynddynt.

  Mae’r Egwyddorion hyn yn berthnasol i bob unigolyn cofrestredig sy’n gweithio mewn unrhyw leoliad iechyd neu ofal cymdeithasol ledled y Deyrnas Unedig,
  gan gynnwys, ond heb fod yn gyfyngedig i’r GIG, y sector gofal cymdeithasol, a’r sectorau annibynnol ac elusennol.

  Dylai rhaglenni Tiwtoriaeth:
  
  a) gael eu teilwra i roi ystyriaeth i’r amgylchedd y mae’r Tiwtorai penodol yn gweithio ynddo;
  
  b) bod yn hyblyg er mwyn cefnogi cyfnodau pontio o wahanol fathau mewn modd amserol;
  
  c) bod â hyblygrwydd i allu darparu themâu cyffredin Tiwtoriaeth mewn modd aml-broffesiwn yn ogystal â sicrhau y caiff elfennau penodol i broffesiwn eu darparu lle bo angen;
  
  d) bod â chynllun strwythuredig sy’n disgrifio sut mae’r rhaglen yn darparu llwyddiant i’r Tiwtoreion;
  
  e) amrywio o ran hyd a chynnwys yn ôl anghenion y Tiwtorai unigol a’r sefydliad. Gall gwledydd, rhanbarthau neu sefydliadau unigol osod lleiafswm neu fwyafswm ar gyfer hyd Tiwtoriaeth; a
  
  f) bod yn ymwybodol o, ac yn gydnaws â, rhaglenni datblygu eraill ar gyfer proffesiynau penodol a’r gweithlu.